ЭМИЙН БҮТЭЭГДЭХҮҮНИЙ СЭРЭМЖЛҮҮЛЭГ №01/2025 ХУУРАМЧ ОКСИКОНТИН 80 мг ЭМИЙН ТАЛААР
ЭМИЙН БҮТЭЭГДЭХҮҮНИЙ СЭРЭМЖЛҮҮЛЭГ №01/2025
ХУУРАМЧ ОКСИКОНТИН 80 мг ЭМИЙН ТАЛААР
Хуурамч OXYCONTIN 80 мг (Оксикодоны гидрохлорид)-ийн нэг цувралын бүтээгдэхүүнийг Швейцари улсын албан бус зах зээлээс илрүүлсэн талаар албан ёсны үйлдвэрлэгч болох MUNDIPHARMA-аас 2025 оны 2-р сард ДЭМБ-д мэдээлсэн.
Хуурамч бүтээгдэхүүн нь Польш улсад зөвшөөрөгдсөн жинхэнэ OXYCONTIN 80 мг бүтээгдэхүүнийг дуурайлган хийсэн байна.
OXYCONTIN (Оксикодоны гидрохлорид) нь дунд болон хүнд хэлбэрийн өвдөлтийг эмчлэхэд хэрэглэгддэг хагас нийлэг опийн бүлгийн бодис юм.
Хуурамч бүтээгдэхүүний дээжийн лабораторийн шинжилгээг Швейцарийн Цюрих хотын Эмийн мэдээллийн төвд (DIZ) хийсэн. Уг төв эмийг шалгахад оксикодон агуулаагүй, харин нитазены нэгдлийн нийлэг опийн бодис болохыг тогтоосон.
Нитазений деривативууд (метонитазен, изотонитазен, флуонитазен г.м) нь донтолт үүсгэх өндөр эрсдэлтэй, гаж нөлөө ихтэй тул судалгаанд голчлон ашигладаг нийлэг опийн бүлгийн бодисууд юм. Эдгээр бодисууд нь оксикодоноос хэдэн зуу дахин хүчтэй, тун хэтрэх өндөр эрсдэлтэй.
Тэдгээрийн эрсдэл, хоруу чанар, гаж нөлөө, урт хугацааны үр дагаврын талаар мэдээлэл хязгаарлагдмал байна.
Энэхүү хуурамч бүтээгдэхүүнийг хэрхэн таних вэ
Энэ бүтээгдэхүүний гарал үүсэл, найрлага, эх сурвалжийг санаатайгаар буруу мэдээлсэн тул хуурамч бүтээгдэхүүн гэж тогтоосон. Хуурамч бүтээгдэхүүн нь Польш улсын зах зээлд MUNDIPHARMA компанийн үйлдвэрлэж, худалдаалдаг OXYCONTIN 80мг эмийг дуурайлган хийсэн байна. MUNDIPHARMA нь энэ сэрэмжлүүлэгт дурьдсан бүтээгдэхүүн нь хуурамч бөгөөд тус компаниас үйлдвэрлээгүй болохыг баталжээ.
Дараах илэрхий зөрүүтэй байдлаар энэхүү бүтээгдэхүүнийг хуурамч гэж танина.
• Хуурамч бүтээгдэхүүн дээрх цувралын дугаар болон хүчинтэй хугацааны байрлал буруу байсан.
• Хуурамч бүтээгдэхүүний цувралын дугаар болон хүчинтэй хугацаа блистрийн урд талд харагдана.
• Жинхэнэ OXYCONTIN нь цувралын дугаар болон хүчинтэй хугацаа блистрийн ар талд харагдана.
• Хуурамч бүтээгдэхүүний хүчинтэй хугацаа нь зүүн талд, цувралын дугаар нь баруун талд нь байна.
• Жинхэнэ OXYCONTIN нь цувралын дугаар нь зүүн талд, хүчинтэй хугацаа нь баруун талд байна.
Хуурамч бүтээгдэхүүний талаарх дэлгэрэнгүй мэдээллийг энэхүү сэрэмжлүүлгийн хүснэгт 1-ээс харна уу.
Эрсдэл
Энэхүү хуурамч бүтээгдэхүүнд мэдээлээгүй нитазены нэгдлүүдийг агуулсан болох нь тогтоогдсон ба түүнийг бага тунгаар хэрэглэхэд ч ноцтой гаж нөлөө үзүүлэх магадлал өндөр байдаг.
Нитазен нь бусад опийн бүлэгтэй төстэй нөлөө үзүүлдэг бөгөөд тун хэтэрснээс үхэлд хүргэх эрсдэлтэй.
Нитазены деривативыг хэрэглэсэнтэй холбоотой нас баралтын хэд хэдэн тохиолдол гарч байсан. Тэдгээрийг согтууруулах ундаа эсвэл бензодиапезиний бүлгийн эмтэй хамт хэрэглэх нь маш аюултай бөгөөд амьсгалын замын дутагдалд хүргэх, цусны даралт бууруулахаас гадна цаашилбал кома, үхэлд хүргэнэ.
Хуурамч OXYCONTIN-ийг Польш, Швейцарь, Швед, Ирландаас ДЭМБ-д урьд нь мэдээлж байсан.
Эмнэлгийн мэргэжилтнүүд, Эмийн зохицуулалтын байгууллагууд, олон нийтэд өгөх зөвлөгөө
Эмнэлгийн мэргэжилтнүүд аливаа гаж нөлөө, эмчилгээ үр дүн муутай байх, хуурамч хэмээн сэжиглэсэн тохиолдлын талаар Эмийн зохицуулалтын байгууллагад мэдээлэх шаардлагатай. ДЭМБ эдгээр хуурамч бүтээгдэхүүнд өртөж болзошгүй улс орон, бүс нутгуудын нийлүүлэлтийн сүлжээнд хяналт, шалгалтыг нэмэгдүүлэхийг зөвлөж байна.
Хэрэв Оксиконтиныг хэтрүүлэн хэрэглэсэн гэж сэжиглэж байгаа бол (ялангуяа албан бус зах зээл дээрээс худалдаж авсан бүтээгдэхүүнээс), нитазены хордлого байж болзошгүйг анхаарах хэрэгтэй.
ДЭМБ эдгээр бүтээгдэхүүнийг хэрэглэхгүй байхыг зөвлөж байна. Энэхүү хуурамч бүтээгдэхүүн илэрсэн тохиолдолд эрх бүхий байгууллагууд ДЭМБ-д яаралтай мэдэгдэх шаардлагатай.
Хэрвээ та болон таны таньдаг хэн нэгэн уг бүтээгдэхүүнийг хэрэглэсэн буюу хэрэглэсэн байж магадгүй, эсвэл хэрэглэснээр урьдчилан таамаглаагүй гаж нөлөө илэрсэн бол эмнэлгийн мэргэжилтэнд хандахыг зөвлөж байна. Бүх бүтээгдэхүүнийг эрх бүхий/зөвшөөрөлтэй ханган нийлүүлэгчдээс авах ёстой.
Хүснэгт 1. ДЭМБ-ын сэрэмжлүүлэг №01/2025
| Бүтээгдэхүүний нэр | OxyContin 80mg |
| Үйлдвэрлэгч | Mundipharma A/S |
| Цувралын дугаар | 262174 |
| Хүчинтэй хугацаа | 12/2025 |
| Илэрсэн улс | Швейцари |
| Илэрсэн байдал | |
Монгол Улсын эмийн бүртгэлд Оксикодон (Оксикодоны гидрохлорид) худалдааны нэртэй шахмал эм бүртгэгдээгүй болно.
Дээрх сэрэмжлүүлэгт дурьдсан бүтээгдэхүүн зах зээлд худалдаалагдаж байвал мэдээллийг Эм, эмнэлгийн хэрэгслийн хяналт зохицуулалтын газрын Эмийн аюулгүй байдал, тандалт судалгааны газарт ирүүлнэ үү.