Улсын хэмжээнд “ЭМИЙН АЮУЛГҮЙ БАЙДЛЫН ДОЛОО ХОНОГ” аян зохион байгуулагдаж байна.

Монгол Улсын Засгийн газрын тогтоолоор 2020 онд бие даасан Эмийн үндэсний зохицуулалтын байгууллага буюу Эм, эмнэлгийн хэрэгслийн хяналт, зохицуулалтын газар байгуулагдаж, Дэлхийн эрүүл мэндийн байгууллагын олон улсын эмийн аюулгүй байдлын хяналтын хөтөлбөрийг хэрэгжүүлэгч УППСАЛА төвд албан ёсны гишүүнээр нэгдэх эрх зүйн байдал бүрдэж, 2021 онд тус төвийн 149 дэх жинхэнэ гишүүн орноор элссэнээр олон улсын эмийн хяналтын хөтөлбөрийг хэрэгжүүлэгч орнуудын нэг болсон. 

УППСАЛА төв нь 2016 оноос хойш иргэд, эмнэлгийн мэргэжилтний гаж нөлөөний талаарх ойлголт, мэдлэгийг сайжруулах, түүнийг мэдээлэхийн ач холбогдлыг таниулах зорилгоор “MedSafetyWeek-Эмийн аюулгүй байдлын долоо хоног” аяныг зохион байгуулж ирсэн нь гаж нөлөө бүртгэн мэдээлэх тогтолцоо бүрэн цахимжсан төдийгүй  олон улстай эмийн аюулгүй байдлын дохио, мэдээллийг шуурхай солилцох боломж бүрдэн, үндэсний фармаковижилансын тогтолцоонд томоохон дэвшил гараад байна.

Энэ жилийн MedSafetyWeek-2024 арга хэмжээ 2024 оны 11 дүгээр сарын 04-өөс 10-ны өдрийн хооронд “Гаж нөлөөнөөс урьдчилан сэргийлье”  уриан дор Дэлхийн 100 гаруй эмийн зохицуулалтын байгууллага, 90 гаруй улс орныг эгнээндээ нэгтгээд байна.

Тус аяны хүрээнд иргэдийн эмийн гаж нөлөөний талаарх ойлголт, мэдлэгийг сайжруулах, эмийн гаж нөлөөнөөс сэргийлэх, гаж нөлөөг хэрхэн мэдээлэх, мэдээлэхийн ач холбогдлыг олон нийтийн цахим сүлжээгээр дамжуулан таниулан сурталчилахад чиглэсэн арга хэмжээ зохион байгуулах гэж байна.

Улсын хэмжээнд 2017-2024 онуудад эмийн гаж нөлөөний тохиолдол нийт 880  үндэсний мэдээний санд бүртгэгдсэн байна. ЭЭХХЗГ нь мэдээлэгдсэн гаж нөлөөний тохиолдол бүрийг үнэлж, тухай бүр Эм судлалын салбар зөвлөлийн хурлаар хэлэлцүүлэн үнэлгээг баталгаажуулан, шаардлагатай тохиолдлуудад зохицуулалтын шийдвэр, зөвлөмжийг гарган эрсдэлийг бууруулах арга хэмжээг авч хэрэгжүүлэн ажиллаж байна.

Иймд эмийн гаж нөлөөний сэжигтэй тохиолдол бүрийг мэдээлэх нь судлагдаагүй ховор, ноцтой гаж нөлөөний тохиолдлыг илрүүлэхээс гадна, хуурамч, стандартын бус, бүртгэлгүй эм болон бусад эмийн хэрэглээтэй холбоотой асуудлыг илрүүлэн, шуурхай арга хэмжээ авах боломжийг бүрдүүлж байдаг.

Өнөөдрийн байдлаар манай улсад эмийн аюулгүй байдлын хяналт нь Эм, эмнэлгийн хэрэгслийн тухай хууль, ЭМС-ын 2023 оны А/67 дугаар тушаалаар батлагдсан “Эмийн гаж нөлөөг бүртгэх, мэдээлэх, үнэлэх, баталгаажуулах” журмаар зохицуулагдаж байна. 

ДЭМБ-ын зөвлөмжөөр эмийн гаж нөлөөний мэдээлэл илүү сайн цуглуулахын тулд аль болох олон эх үүсвэрийг ашиглахыг зөвлөдөг. Манай улс одоогийн байдлаар дараах эх үүсвэрүүдийг ашиглан гаж нөлөөний тохиолдлыг хүлээн авч байна. Үүнд: уламжлалт хэлбэр буюу гараар маягт бөглөх цаасан хэлбэр, шууд утсаар холбогдох, gajnoloo@mmra.gov.mn цахим хаяг болон иРепортинг цахим системүүд багтаж байна.

Мөн гаж нөлөө мэдээлэх цахим систем шинэчлэгдэж, гар утас, комьютерт суурилуулан ашиглах боломжтой VigiMobile аппликэйшн хэрэглээнд нэвтэрлээ. Тус аппликэйшн нь интернет сүлжээгүй үед гаж нөлөөний мэдээллийг бүртгэх боломжтой бөгөөд, сүлжээнд холбогдсон үед өмнө хадгалсан мэдээллийг илгээх боломжийг олгож буйгаараа давуу талтай. Мөн илгээсэн тохиолдол бүрийг өөрийн төхөөрөмж дээрээ татаж аван, архив үүсгэж, мэдээний сангаа хөтлөх боломжтой юм. Ингэснээр манай улсын хөдөө орон нутгийн аль ч бүсээс эмийн гаж нөлөөний тохиолдлыг хүлээн авах боломж бүрдэж байгаа нь эмийн аюулгүй байдлын хяналтын тогтолцоонд гарч буй томоохон алхам болж байна.

Иймд эм хэрэглэсэнтэй холбоотой илэрсэн гаж нөлөөний сэжигтэй тохиолдол бүрийг дээрх хэлбэрүүдээс өөрт тохиромжтойг сонгон бидэнд мэдээлснээр цаашид учирч болзошгүй эрдэлээс хэн нэгнийг хамгаалах боломжтой. 

Мэдээлэл бүр үнэ цэнэтэй. 

Дараах холбоосоор дарж иРепортинг цахим системтэй танилцана уу. https://mmra.gov.mn/?id=200312]

#MedSafetyWeek #MMRA