Апротинин эмийн эрсдэлээс сэргийлэх сэрэмжлүүлэг №04/2024

Сэрэмжлүүлэг Tweet Share 7/1/2024 555 үзсэн

Монгол Улсын эмийн бүртгэлд анх 1999 оноос бүртгэгдэн эмнэлгийн тусламж үйлчилгээнд өргөн хэрэглэгдэж ирсэн Апротинин (Гордокс) 100 000 КИЕ тарилгын эмийн заалтын бус хэрэглээтэй холбоотой 2023 онд Эм, эмнэлгийн хэрэгслийн хяналт зохицуулалтын газрын гаж нөлөөний үндэсний мэдээний санд ноцтой 2 тохиолдол бүртгэгдсэн.

Дээрх тохиолдолтой холбогдуулан 2023 оноос эхлэн ЭЭХХЗГ-аас манай улсад бүртггэлтэй Апротинин агуулсан эмийн идэвхтэй тандалтыг хийж, ЭМЯ-ны Хүний эмийн зөвлөл болон Эм судлалын салбар зөвлөлийн хурлаас дараах зохицуулалтын шийдвэр гарсан. Үүнд:

  1. Хүний эмийн зөвлөлийн 2023 оны 06 дугаар сарын 07 дугаар хурлын шийдвэрээр БНЭУ-ын Reannon Pharmaceutical үйлдвэрлэгчийн Апротинин (Ренонтрикал) 10000МЕ тарилгын эмийн бүртгэлийг түдгэлзүүлсэн.
  2. Үйлдвэрлэгчээс ирүүлсэн судалгааны нотлох баримтыг үндэслэн Эм судлалын салбар зөвлөлийн 2023 оны  11 дүгээр сарын 07 дугаар хурлаар тус эмийн хэрэглэх зааварт  өөрчлөлт оруулснаар “Нойр булчирхайн цочмог үрэвсэлд” гэх заалт хасагдсан.
  3. Хүний эмийн зөвлөлийн 2024 оны 05 дугаар сарын 20-ны өдрийн 04 дүгээр хурлын шийдвэрээр Апротинин (Гордокс) 100000КИЕ тарилгын эмийг үйлдвэрлэгчийн хүсэлтээр Монгол Улсын эмийн бүртгэлээс хасах шийдвэр гарсан.

Энэхүү шийдвэртэй холбогдуулан нийт эрүүл мэндийн байгууллага, эмнэлгийн мэргэжилтнүүд эмчилгээ, үйлчилгээ, эмийн сонголтод анхаарна уу:

  • Монгол Улсын эмийн бүртгэлд “Нойр булчирхайн цочмог үрэвсэлд” гэх хэрэглэх заалттай Апротинин агуулсан эм байхгүй болно.

Апротинин (Гордокс) тарилгын эм нь бүртгэлгүй эм ангилалд орж буй тул Монгол Улсын зах зээлд нийлүүлэх, худалдах, борлуулах болон эмнэлгийн тусламж үйлчилгээнд хэрэглэх боломжгүйг анхаарна уу.