“GMP шаардлагад нийцэх Цацраг идэвхт эмийн үйлдвэрлэлийн эрх зүйн байдал” сэдэвт уулзалт болж байна.

Олон Улсын Атомын энергийн агентлаг (ОУАЭА), Монгол Улсын Цөмийн энергийн комисс, Улсын хоёрдугаар төв эмнэлэг болон Эм, эмнэлгийн хэрэгслийн хяналт, зохицуулалтын газар хамтран энэ сарын 18-наас 22-ны өдрүүдэд “GMP шаардлагад нийцэх Цацраг идэвхт эмийн үйлдвэрлэлийн эрх зүйн байдал” сэдэвт уулзалтыг Улаанбаатар хотод зохион байгуулж байна.

ОУАЭА нь цацраг идэвхт эмийн үйлдвэрлэлт болон түүнд суурилсан оношилгоо, эмчилгээний нэгдсэн стандартын шаардлагад нийцүүлэн эрүүл мэндийн тусламж үйлчилгээнд ашиглахыг онцгойлон анхаардаг бөгөөд улс орнуудын цөмийн анагаах ухааны хөгжил дэвшлийн ялгаатай байдлыг багасгах үйл ажиллагааг зорилго болгодог.

Монгол улсад ОУАЭА-н хурал зохион байгуулж байгаа нь улс орнуудын хамтын ажиллагааг бэхжүүлэх, үйлдвэрлэлийн зохистой дадалд суурилсан цацраг идэвхт эм үйлдвэрлэлийн туршлага солилцох, тулгамдсан асуудлуудад гарц гаргалгаа олох түүнчлэн Монгол улсын цөмийн оношилгоо эмчилгээний салбарын хөгжилд нэгээхэн том алхам бүхий ахиц дэвшил болж байгаа юм.

Тус уулзалтад нийт 16 орны 30 гаруй мэргэжилтэн хамрагдаж байгаа бөгөөд ОУАЭА-н зөвлөх, мөн тус байгууллагыг төлөөлж Итали, АНУ, Канад болон Пакистан улсын шилдэг судлаач экспертүүд эм үйлдвэрлэлийн сайн туршлагаасаа хуваалцаж байна.