“Эм үйлдвэрлэлийн зохистой дадал” GMP-ийн батламж олголоо

Монгол Улсын Их хурлын 2014 оны 57 дугаар тогтоолоор батлагдсан Төрөөс эмийн талаар баримтлах бодлогын 7.3.3-д “Импортыг орлох, зайлшгүй шаардлагатай эм, эмнэлгийн хэрэгслийг дотооддоо үйлдвэрлэхэд төрөөс дэмжлэг үзүүлэх” заалт, УИХ-ын 2012 оны 37 дугаар тогтоолоор  батлагдсан Засгийн газрын 2012-2016 оны үйл ажиллагааны мөрийн хөтөлбөрийн 183.1-д “Эм үйлдвэрлэлийн зохистой дадал (GМР) нэвтрүүлсэн үндэсний эмийн үйлдвэрүүдэд батламж олгоно” гэсэн заалт тусгагдсан байдаг.

Эм, эмнэлгийн хэрэгслийн хяналт, зохицуулалтын газрын даргын 2021 оны 08 сарын 25-ны өдрийн А/168 дугаар тушаалаар батлагдсан “Эм үйлдвэрлэлийн зохистой дадал (GMP)-ийн батламж олгох журам”-ын 6.2, 6.3 дахь хэсэг, Хүний эмийн зөвлөлийн 2021 оны 03 дугаар сарын 31-ний өдрийн 7 дугаар хурлын шийдвэрийн дагуу үндэсний 4 эмийн үйлдвэрт “Эм үйлдвэрлэлийн зохистой дадал (GMP)-ийн батламжийг олголоо.

Шинээр Армон эмийн үйлдвэрийн Европ хатуу тугнагдсан эмийн үйлдвэр “Эм үйлдвэрлэлд тавигдах ерөнхий шаардлага” MNS 5524:2014 стандартын шаардлага, Уламжлалт эмийн үйлдвэр “Уламжлалт эмийн үйлдвэрлэлд тавигдах ерөнхий шаардлага” MNS 5524-3:2015 стандартын шаардлагыг тус тус хангасан тул “Эм үйлдвэрлэлийн зохистой дадал (GMP)”-ийн батламжийг гурван жилийн хугацаатай олгож байна. Монгол улсад “Эм үйлдвэрлэлийн зохистой дадал (GMP)”-ийн шаардлага хангасан 7 дахь  үндэсний эмийн үйлдвэр болж байна.

Нахиа, Айвико, Энхийн шүүдэр  эмийн үйлдвэрүүдийн “Эм үйлдвэрлэлийн зохистой дадал” (GMP)-ын батламжийн хугацааг тус тус гурван жилийн хугацаатай сунгалаа.