Зах зээлд буй 29 үйлдвэрлэгчийн 33 нэр төрлийн түргэвчилсэн оношлуурт үнэлгээ хийлээ
Манай улсын зах зээлд хэрэглэгдэж буй Коронавируст (КОВИД-19) халдварыг илрүүлэх антиген суурьтай түргэвчилсэн оношлуурыг баталгаажуулах зорилгоор баримтын үнэлгээг 7-р сарын 19-нөөс 30-ны хооронд хийж, үр дүнг танилцууллаа. Чанарын шаардлага хангахгүй оношлуур зах зээлд нэвтрэхээс сэргийлэхийн тулд уг үнэлгээгээр нийт 35 эм ханган нийлүүлэх байгууллагын импортоор оруулж ирж буй 33 нэр төрлийн түргэвчилсэн оношлуурыг баталгаажуулжээ. Үнэлгээний үр дүнгээс товч дурдахад, манай улсад нийт 5 улсын 29 үйлдвэрлэгчийн антиген суурьтай тургэвчилсэн оношлуурыг хэрэглэж байгаагаас ДЭМБ-ын яаралтай нөхцөлд хэрэглэх зөвшөөрөлтэй 3, АНУ-ын Хүнс, Эмийн Зохицуулах Агентлагаас зөвшөөрсөн 1, Австралийн Эрүүл Мэндийн Зохицуулах Агентлагаас зөвшөөрсөн 5, Канад улсын зохицуулах агентлагаас зөвшөөрсөн 1, Европын Холбооны нийтлэг жагсаалтад багтсан 18 үйлдвэрийн оношлуур тус тус байна.Мөн эдгээр оношлуурыг олон улсын стандартын шаардлага хангасан байдал, баталгаажуулах гэрчилгээг ямар байгууллагаас, хэдэн удаа олгосноор нь ангилахад I ангилалд 3, II ангилалд 10, III ангилалд 4, IV ангилалд 16 оношлуур тус тус багтсан.
Баримтад суурилсан үнэлгээний үр дүнг 08 сарын 03-ны өдөр Оношлуур, биобэлдмэлийн салбар зөвлөлийн хурлаар хэлэлцүүлж, санал зөвлөмжийг тусган, үнэлгээнд хамрагдсан нийт эм ханган нийлүүлэх байгууллагуудад танилцуулав.
