"Айвико" тарилгын шингэний үйлдвэр болон "Мерит" эмийн үйлдвэрийн үйл ажиллагаатай танилцав

Эм, эмнэлгийн хэрэглэгдэхүүний тухай хуулийн шинэчилсэн найруулгын төслийн дэд ажлын хэсгийнхэн “Айвико” тарилгын шингэний үйлдвэр болон “Мерит” эмийн үйлдвэрт ажиллалаа. Энэ үеэр үйлдвэрлэгчдэд тулгамдаж буй асуудлын талаар сонсож, өдөр тутмын үйл ажиллагаатай танилцсан юм. Манай улсын анхны эм үйлдвэрлэлийн зохистой дадал /GMP/-ын шаардлага хангасан “Айвико” эмийн үйлдвэрийн үйл ажиллагаа, дотоод хяналт, үнэлгээний явцтай танилцаж, цаашид хэрэгжүүлэх ажлуудын талаар санал солилцов. Энэ үеэр тус эмийн үйлдвэр нь ойрын хугацаанд гадаад улс руу бүтээгдэхүүнээ экспортлох ажлыг бодлогоор дэмжих шаардлагатай байгааг уламжилж байлаа. Түүнчлэн “Мерит” эмийн үйлдвэртэй танилцсанаар эм үйлдвэрлэлийн зохистой дадал /GMP/-ын шаардлага хангахад тулгамдаж буй асуудал, тэдгээрийг шийдвэрлэх зөв гарц, шийдлийн талаар ажлын хэсгийн гишүүд хэлэлцсэн юм. Уг ажлын хэсгийн бүрэлдэхүүнд УИХ-ын гишүүн, ажлын хэсгийн ахлагч Ж.Чинбүрэн, УИХ-ын гишүүн С.Ганбаатар, Эм, эмнэлгийн хэрэгслийн хяналт зохицуулалтын газрын дрга Б.Цэцэгсайхан, УИХ-ын Нийгмийн бодлогын байнгын хорооны ажлын алба, хуулийн ажлын хэсгийн гишүүд, Эрүүл мэндийн яам, Эм зүйн байгууллагуудын нэгдсэн “Эм холбоо” ТББ-ын төлөөлөл оролцов.