Эм, эмнэлгийн хэрэгслийн хяналт, зохицуулалтын газрын даргаар Б.Цэцэгсайханыг томиллоо

Монгол Улсын засгийн газрын 2021 оны 01-р сарын 20-ны өдрийн 22-р тогтоолоор Эм, эмнэлгийн хэрэгслийн хяналт, зохицуулалтын газрын даргаар Анагаах ухааны доктор Батмөнх овогтой Цэцэгсайханыг томиллоо. Б.Цэцэгсайхан нь 2001 онд ОХУ-ын Улс Түмний Найрамдлын Их сургуулийг хүний их эмч мэргэжлээр төгсөж, 2005 онд тус сургуульд анагаах ухааны докторын зэрэг хамгаалжээ. Тэрээр 2014 онд Австралийн Шинэ Өмнөд Уэльсийн Их Сургуульд эрүүл мэндийн удирдлага, нийгмийн эрүүл мэндийн магистрийн зэрэг хамгаалж, мөн ХБНГУ, АНУ, Тайвань, Австрали улсад тус тус мэргэжил дээшлүүлсэн болно.

Б.Цэцэгсайхан нь хүний их эмч мэргэжилтэй бөгөөд ажлын гараагаа 2001 онд Говь-Алтай аймгийн Алтай сумын хилийн цэргийн ангийн хүн эмнэлгийн албанаас эхэлж байжээ. Түүнчлэн ажилласан байдлын тухайд 2005-2007 онд Мэргэжлийн Хяналтын Ерөнхий Газрын нэгдсэн төв лабораторийн техникийн менежер, мөн орлогч эрхлэгчээр, 2007-2013 онд Эрүүл Мэндийн Яамны нийгмийн эрүүл мэндийн бодлогын хэрэгжилтийг зохицуулах газрын мэргэжилтнээр, 2014-2015 онд Дэлхийн Эрүүл Мэндийн Байгууллагын дархлаажуулалтын асуудал хариуцсан мэргэжилтнээр, 2016-2017 онд Эрүүл мэндийн сайдын зөвлөхөөр, 2017 оноос хойш Хавдрын үндэсний зөвлөл НҮТББ-ын гүйцэтгэх захирлаар тус тус ажиллаж байжээ.

Б.Цэцэгсайханы эрүүл мэндийн салбарт ажилласан туршлага, олон улсад эзэмшсэн практик мэдлэг, хамтын болон бие даасан судалгаа, шинжилгээний ажлууд зэргийг харгалзан шинэ байгуулагдсан агентлагийг удирдуулахаар шийдвэрлэсэн. Тус агентлаг байгуулагдсанаар эм зүйн салбарт төрийн бодлогыг хэрэгжүүлэх, нэгдсэн зохицуулалтаар хянах, хүн амын эмийн хэрэглээ, хангамж, чанар, үнийн асуудалд оновчтой гарц, шийдлүүдийг цогц системээр нэвтрүүлж ажиллахаар боллоо.